Lululemon-ийн гүйцэтгэх захирал Калвин Макдоналд нэгдүгээр сард огцорно
Идэвхтэй спорт хувцасны жижиглэн худалдаалагч Lululemon Athletica компани гүйцэтгэх захирал Калвин Макдоналд ойролцоогоор долоон жил ажилласны эцэст 2026 оны нэгдүгээр сарын 31-нээс эхлэн албан тушаалаасаа огцрох болсныг пүрэв гарагт мэдэгдлээ. Тус компани шинэ гүйцэтгэх захирлын эрэлд гарсан гэдгээ мөн албан ёсоор зарлав.
Удирдлагын энэхүү өөрчлөлтийн мэдээтэй зэрэгцэн Lululemon компани жилийн орлого болон ашгийн таамаглалаа нэмэгдүүлсэн нь хөрөнгө оруулагчдын анхаарлыг татлаа. АНУ-ын зах зээлд шинээр гаргасан спорт хувцасны бүтээгдэхүүний эрэлт сэргэж байгаа нь компанийн ирэх хугацааны гүйцэтгэлд эерэгээр нөлөөлнө гэж удирдлагууд үзэж байна.
Компанийн гуравдугаар улирлын цэвэр орлого 7 хувиар өсөж, 2.6 тэрбум ам.долларт хүрсэн нь олон улсын зах зээл дэх хүчтэй эрэлттэй шууд холбоотой байв. Харин Америк тив дэх борлуулалт 2 хувиар буурсан нь дотоодын хэрэглээ сул байгааг илтгэж байна.
Мөн Lululemon компани хувьцаагаа буцаан худалдан авах хөтөлбөрөө 1 тэрбум ам.доллараар нэмэгдүүлэхийг зөвшөөрсөн нь зах зээлд эерэг дохио өгч, үүний дараа компанийн хувьцааны үнэ биржийн хаалтын дараах арилжаанд бараг 5 хувиар өсжээ.
Йог болон идэвхтэй спортын хувцас үйлдвэрлэгч тус компани одоо жилийн орлогоо 10.962–11.047 тэрбум ам.долларт хүрнэ гэж тооцоолж байгаа нь өмнөх 10.85–11 тэрбум ам.долларын таамаглалаас илүү өндөр үзүүлэлт юм.
Зах зээлийн сорилт, удирдлагын шилжилтийн үед ч Lululemon-ийн санхүүгийн үзүүлэлтүүд харьцангуй тогтвортой байгаа нь компанийн брэндийн хүч болон олон улсын өсөлт чухал нөлөө үзүүлж байгааг харуулж байна.
Сэтгэгдэл ачаалж байна...