Хятадад 82 настай нэгэн буурай эмнэлэгт хэвтэн эмчлүүлж буй эхнэртэйгээ уулзахын тулд өдөр бүр 12 цагийг замд зарцуулдаг байсан сэтгэл хөдөлгөм түүхийг South China Morning Post онцолжээ.
Хятадын хэвлэлүүдийн мэдээлснээр, Чэнь Ачун хэмээх 82 настай эр эхнэр Сюэтэйгээ ханилаад 50 гаруй жил болсон байна. Жилийн өмнө түүний гэргий цус харваж, улмаар хүнд хэлбэрийн уушгины хатгалгаа туссаны улмаас Нинбо хотын нэгэн эмнэлгийн эрчимт эмчилгээний тасагт хэвтжээ.
Хүү нь ажил ихтэй тул Чэнь гуай эхнэрээ асрах бүх хариуцлагыг өөртөө хүлээж авсан байна. Тэрбээр өдөр бүр үүрийн 04:30 цагт босож, хоол ундыг нь бэлдэн, хэд хэдэн дамжлага автобусаар эмнэлэг рүү зорчдог байжээ.
Эрчимт эмчилгээний тасагт өвчтөн эргэх хугацаа ердөө 10:30-11:00 цагийн хооронд 30 минут үргэлжилдэг ч Чэнь гуай үдийн цай хүртэл эмнэлэгт саатаж, дараа нь гэр рүүгээ буцдаг байсан аж. Ингэж ирж очиход нийтдээ 12 цагийг замд өнгөрүүлдэг байжээ.
Түүний энэ тууштай халамж, олон жилийн үнэнч хайрыг илэрхийлсэн үйлдэл олон нийтийн сэтгэлийг хөдөлгөж, гэр бүлийн үнэ цэнэ, ахмад үеийн хайр халамжийн тод жишээ хэмээн үнэлэгдэж байна.
Сэтгэгдэл ачаалж байна...