Цусны шинжилгээгээр эндометриозыг хурдан оношлох шинэ боломж бүрдлээ

Сарын тэмдэг бүр өвдөлт дагуулдаг ч

“Бусад эмэгтэйчүүд ч бас тэсдэг” гэж өөрийгөө тайвшруулсаар олон жил шалтгаанаа мэдэхгүй явж байсан эмэгтэйчүүд цөөнгүй.

2026 онд Эндометриоз өвчнийг оношлоход олон жил шаарддаг асуудлыг шийдвэрлэх шинэ цусны шинжилгээ боловсруулагдсаныг эрдэмтэд мэдээллээ. Энэхүү шинжилгээ нь өвчнийг оношлоход дунджаар 6–8 жил зарцуулдаг хүлээлтийг богиносгох боломжтой гэж судлаачид онцолж байна.

Шинэ судалгааг Австралийн Пертийн Proteomics International болон Мельбурны Их Сургууль хамтран хэрэгжүүлсэн бөгөөд эмэгтэйчүүдийн эрүүл мэндийн салбарт томоохон ахиц хэмээн үнэлэгдэж байна.

Эндометриоз гэж юу вэ?

Эндометриоз нь умайн салстын эд умайн гадна ургаж, архаг үрэвсэл, өвдөлт үүсгэдэг эмгэг юм. Уг өвчин дараах шинж тэмдгээр илэрдэг. Үүнд:

Сарын тэмдгийн хүчтэй өвдөлт

Тогтмол бус цус алдалт

Аарцаг, нуруу, хэвлийн доод хэсгийн архаг өвдөлт

Жирэмслэх боломж буурах

Одоог хүртэл эндометриозыг баталгаатай оношлоход ихэвчлэн эндоскопийн мэс засал (laparoscopy) шаардлагатай байсан нь эмэгтэйчүүдэд удаан хугацааны хүлээлт, эрсдэл, сэтгэл зүйн дарамт үүсгэдэг байжээ.

Шинэ цусны шинжилгээ хэрхэн ажилладаг вэ?

Судлаачид цусны плазма дахь уургийн молекулуудыг (proteomics) шинжилсний үр дүнд:

Эндометриозтой холбоотой 48 уургийн өөрчлөлт илрүүлсэн. Үүнээс 10 гол биомаркер нь өвчнийг өндөр нарийвчлалтайгаар илрүүлэх боломжтой болохыг тогтоосон байна. Шинжилгээг цусны нэг удаагийн сорьцоор хийх боломжтой бөгөөд энэ нь инвазив бус оношилгоо юм. Энэхүү арга нь оношилгоог илүү хурдан, өвдөлтгүй, аюул багатай болгох боломжийг нээж байна.

Шинэ цусны шинжилгээ нь:

Эндометриозын онош олон жилээр хойшлох асуудлыг бууруулах

Эрт оношилгоо, эмчилгээний боломжийг нэмэгдүүлэх

Эмэгтэйчүүдийн амьдралын чанарыг сайжруулах

давуу талтай гэж судлаачид үзэж байна.

Одоогоор уг шинжилгээг эмнэлзүйн практикт бүрэн нэвтрүүлэхийн тулд нэмэлт судалгаа, баталгаажуулалт шаардлагатай ч эрдэмтэд үүнийг эмэгтэйчүүдийн эрүүл мэндийн оношилгоонд шинэ шат нээх боломжтой гэж дүгнэжээ.

Эх сурвалж: www.news.com