Хятадын сагсанбөмбөгийн ирээдүй гэгдэж буй Жан Жию (Zang Zyi) ердөө 18 насандаа Эмэгтэйчүүдийн Хятадын Сагсанбөмбөгийн Холбоо (WCBA)-д мэргэжлийн анхны тоглолтоо хийж, олны анхаарлыг татлаа.
2.26 метр (7’5”) өндөртэй Жан Жию талбай дээр өрсөлдөгчдөөсөө илт давуу харагддаг бөгөөд түүнийг Хятадад хамгийн их хүлээлт үүсгээд буй залуу тоглогчдын нэг хэмээн үнэлдэг. Тэрээр 2024 оны FIBA U-18 Эмэгтэйчүүдийн Азийн цомын тэмцээнд гайхалтай тоглолтоороо алдаршсан. Тухайн тэмцээний Хятад–Австралийн тоглолтод 44 оноо, 14 самбар авч, тэмцээний MVP шагналыг хүртсэн нь түүний нэрийг Азийн сагсанбөмбөгийн ертөнцөд тод томруун гаргасан юм.
Жан Жию WCBA-д анхны тоглолтоо Шандун багийн бүрэлдэхүүнд хийжээ. Түүнийг сэлгээнээс талбайд гаргасан бөгөөд ердөө 12 минут тоглохдоо 15 оноо, 6 самбар авсан байна. Тэрээр довтолгоонд өндөр үр ашигтай тоглож, 9 шидэлтээс 6-ыг амжилттай болгосон нь богино хугацаанд ч багтаа бодит хувь нэмэр оруулж чаддагаа харууллаа.
Түүний дебют тоглолт 2025–2026 оны улирлын WCBA-ийн 12-р тойрогт болсон бөгөөд Шандун баг Шижяжуан багийг 106–93 харьцаатайгаар хожсон юм.
Тоглолтын дараа Шандун багийн ахлах дасгалжуулагч Хоу Бин:
“Жан Жию хурдан дасаж, талбай дээр маш сайн тоглолт үзүүллээ. Гэхдээ WCBA-ийн өндөр хэмнэл, биеийн хүчний тоглолтод бүрэн дасахад цаг хэрэгтэй”
хэмээн онцолсон байна.
Өндөр нуруу, довтолгоо хамгаалалтын аль алинд нөлөө үзүүлэх чадвар, залуу насны асар их нөөц боломж нь Жан Жиюг Хятадын эмэгтэй сагсанбөмбөгийн дараагийн од болно гэсэн хүлээлтийг улам баталгаажуулж байна. Түүний WCBA дахь хөгжлийг зөвхөн дотоодын лиг бус, Азийн болон дэлхийн сагсанбөмбөг сонирхогчид анхааралтай ажиглах нь дамжиггүй.
Сэтгэгдэл ачаалж байна...